Dabak mare wunli la akyu hpyi hpawng galaw la lu
Sama Ginwang, Dabak buga hpung masha ni hpyen yen ai hpang shawng nnan lang wunli la akyu hpyi hpawng lamang hpe Dabak buga nawku hpung wang kaw November shata 17 ya shani hkying 10:00am aten hta a ngwi apyaw galaw la lu sai lam na chye lu ai.
Dabak buga ni hpyen yen ai kaw na bai wa lu na matu lai wa sai November shata 12 ya shani Asuya ni hte wa hkrum nhtawm, Dabak mare masha teng ai lam sakse wa hkam ai hte seng ang ai ni kaw nna mung, bawm tam jasan ai lam ni galaw sai re.
Daini gaw ra mara magam bungli mahkra hpe galaw hpang sa wa lu na matu, Sama Ginwang Ningbaw, Amu Madu, Dabak mare masha ni shanglawm ai hte shawng nnan wunli la kyu hpyi hpawng hpe wa galaw ai lam re nga nna, Sama Ginwang Muna Kyithkai Hpu-awn Rev. Labang Naw Lawn tsun ai.
“Hpyen yen ni bai wa ai lam gaw kadai shadut shahkat nna wa ai lam nre, tinang nan dawdan la, myit hkawn nna wa ai lam re majaw, kadai mung ndai hpe atsawm sha chye na hkawn hkrang da ra ai re” nga nna Sara matut tsun ai.
KHCC kaw nna dawdan nhtawm, KBC-HDD, Ginwang hpyen yen zinlum komiti ni kaw nna tatut lit la nna, dum nta gap ya ai lam mahkra hpe du wa na 2021 ning February shata hta ngut kre hkra hte March shata kaw nna Dabak mare de wa nga hpang na hku yaw sing da ai lam na chye lu ai.
Dabak mare de bai nhtang wa na htinggaw ni gaw Mungdan Asuya kaw nna jahkrat ya ai nta htinggaw 35, KBC, KHCC, Ginwang ni hku nna woi awn let wa nga na nta htinggaw 216 re lam chye lu ai.
Dabak mare gaw KHCC, KBC kaw nna woi awn ai hte seng ang ai Asuya, Hpyen Dap ni hte jahkrup da ai mare kahtawng (17) kaw na mare langai re lam chye lu ai.
Photo Credit; Naw Lawn Shingni Pan
