Dalu Post gumshem Myen hpyen dap hpe KIA ni sa htim gasat
KIA Masat (2) Dap Ba, Masat (14) Dap Dung ginra, Dalu Mare post gumshem Myen hpyen dap hpe November shata 28 ya shani hkying 10:05am aten, KIA ni sa htim gasat ai kaw na gasat gala majan byin wa ai lam chye lu ai.
Hk.L.Y (86) hte Hk.M.Y (347) pawm hpawm hpyen hpung ni dap jung shara jahkra nga ai Dalu post hpe KIA ni sa htim gasat ai kaw na gasat gala majan byin wa ai re, gasat poi byin nga ai ten gumshem Myen hpyen dap ni Jet Fighter (2) hte bawm wa jahkrat bun ai lam, lit nga ai salang langai tsun ai.
November 28 ya shani sha Ginjaw Ginra, Masat (23) Dap Dung maga de Bumre kaw dap jung nga ai gumshem Myen hpyen dap ni, laknak kaba 81mm gap shadam bun ai lam nga ai.
Ya na zawn KIA hte gumshem Myen hpyen dap lapran lahkawng maga hpyen masa shaja hkat nga ding yang rai nna, gasat gala majan mung, matut na naw byin wa mai ai lam chye lu ai.
