Danai, Lido lam kaw dap jung nga ai gumshem Myen hpyen dap hpe KIA ni sa htim gasat
KIA Masat (2) Dap Ba, Masat (43) Dap Dung ginra, Lido lam ntsa Namhpyek mayan kaw dap jung nga ai, gumshem Myen hpyen dap Hk.M.Y (390) dap hpe November shata praw 10 ya jahpawt hkying 6:00am aten daram kaw nna, KIA ni sa htim gasat ai lam chye lu ai.
Gasat poi byin ai majaw, Namhpyek mare na mungshawa ni gaw, ni nawn ai mare hte tinang shim dum ai shara ni hta koi yen nga ai lam, ginra masha ni tsun ai kaw na chye lu ai.
Matut nna mung Bumre, Hka Ya Bum kaw nga ai gumshem Myen dap ni KIO ginjaw ginra hte ninawn ai maga de shani shagu ngu na daram, laknak kaba gap bun nga ai re.
Ya aten hta KIA ni dap jung shara jahkrat nga ai, Dap Ba, Dap Dung shara ni hta gumshem Myen hpyen dap hte KIA ni hpyen masa shaja hkat nga ding ying re lam chye lu ai.
