Danai Lido lam mayan kaw KIA hte Gumshem Myen hpyen dap ni laja lana gasat poi byin
KIA Masat (2) Dap Ba, Masat (14) Dap Dung ginra, Danai Lido lam mayan hta shimlam la shamu shamawt hkawm nga ai Gumshem Myen hpyen dap ni hte KIA hpyen hpung ni Awng Ra mare makau kaw October shata praw 2 ya jahpawt hkying 8:20am aten kaw nna laja lana gasat poi byin ai lam chye lu ai.
“Gumshem Myen hpyen dap kawn October praw (1) ya shana aten kaw nna Wa Ra Zup mare de sinat laknak hkrup mara gap bun ai majaw, mungshawa Ma langai hkala hkrum ai sha n-ga, ya aten Wa Ra Zup mare masha ni nawku jawng hkan hpyen koi yen nga ma ai hte Nawng Mi mare masha ni hpe mung, Gumshem Myen hpyen ni kawn Poda shaga ai lam nga ai” nga nna dai ginra na lit nga ai salang langai tsun ai.
Gumshem Myen hpyen dap ni kawn KIA Masat (2) Dap Ba ginra, Danai Lido lam mayan de hpyen shamu shamawt ai lam nhkring nsa galaw nga ai majaw, ndai laman KIA hpyen hpung ni hte Gumshem Myen hpyen dap ni gasat poi matut manoi byin nga ai re.
