Danai-Sumbwi Yang lido lam hten ai majaw laiwa laisa yak hkak

Danai Tawang mahkrai lai, Danai-Sumbwi Yang lido lam n gam gyi nna, lam hten za mat ai majaw October 23 ya shani kaw nna hkawm sa hkawm wa nmai galaw sai lam buga masha ni kaw nna chye lu ai.

Lai wa sai yinam ladaw kaw nna Tawang hka kaba wa nhtawm lido lam n gam gyi hpang wa sai re hte marang htu hka kaba shagu lam n gam gyi nna hten za taw ai re lam, ginra masha ni tsun dan ai.

Lam hten za wa ai raitim tau hkrau gram lajang ai lam nnga ai. N gam gyi nna lam hten wa jang danai gaw gap hpung ni kaw nna koi lam hpe sha galaw jai lang ai re.

“Hka kaba nna n gam gyi ai majaw lam hten za ai hte koi lam hpe galaw jai lang ai gaw masum lang rai sai re. Ndai zawn marang htu nna hka kaba shagu n gam gyi ai re.Mi na lam gaw nding mat sai, magaw mat sai re. Ya gaw koi lam mung nmai lai mat sai” nga nna ginra masha Salang lagwi Sau Ying tsun ai.

Ndai lido lam gaw Danai myo hte Sumbwi Yang myo kaba lahkawng hpe matut mahkai ya ai rai nna lido lam kaba langai sha nga ai re.

Lido lam langai sha nga ai re majaw lam hpe lawan ai hku gram lajang ya na hpe ra sharawng ai re. koi lam hpe makau kaw sha galaw da ai re. Jahkring hkring n gam gyi ai shaloi koi lam mung n-grin ai sha, hten za wa ai re, nga nna Ginra masha ni tsun dan ai.

Seng ang ai asuya ni kaw nna ginhtawng htawng wa yang she nlung hte atsawm nyep ya na, gaw gap ya na hku masing jahkrat da ai re hpe mung chye lu ai.