Wunpawng Mungdan Shanglawt Hpyen Dap, Dap Awn Daju, Du Kaba Gunhtang Gam Shawng kaw nna, February shata 8 ya shani, Masat (1) Dap Nawng Daju, Padang Ginshan Gawknu, Hpalap Bum kaw, KIO Tingnyang Up Du Daju Jum Nban La a (60) ning hpring rawt malan mungga hpe wa du sang lang ai lam galaw ai re hpe chye lu ai.
Sang lang hpawng hpe jahpawt daw hta, Dap Nawng kata kaw magam gun nga ai Du, Salang, magam gun ni hpe, Ginjaw gaw lai wa sai hpu shawng hpu ba ni masat tawn ai masing kata matut woi awn nga ai lam, Asuya kaw nna hpaw tawn ai magam dap ni a lam hpe sanglang dan ai lam, Ginjaw Komiti gaw mungshawa hte pawnghpawm nna shawnglam masing hpe galaw nga ai hte tinang ang ai magam bungli hta kangka shakut shaja gunhpai sa wa ga nga nna, rawt malan mungga hta, mahta nna sang lang ai lam galaw ai re lam chye lu ai.
Shana daw hta gaw, Maga Yang, Na Ru, Hpalap, Lahta Mali, Lawu Mali, Ja Hta mare hte makau grupyin hta nga ai mungshawa ni hte laksan hkrum nna, KIO a magam bungli hta mungshawa ni hpaji jaw ladat kaja shaw lawm nna myusha lawt lu na lam hta jawm shakut sa wa ga nga nna rawt malan mungga hpe hti sang lang let n gun jaw hpaji jaw ai lam nga ai re lam chye lu ai.