Dap Ba 4 ginra hta shara 2 kaw KIA hte Myen hpyen hpung ni gasat gala mabyin
Mungmyit Sinli Ga (Kachin Sub-state) KIA Dap Ba 4, Dap Dung 8 ginra, Mung Sing maga na shamu shamawt rawt wa ai Myen Hpyen Dap Hk.L.Y 324 dap na hpyen n gun 50 daram hte KIA hpyen hpung ni October shata 24 ya shani hta shara 2 kaw gasat gala majan byin ai lam chye lu ai.
Myen hpyen hpung ni gaw, October 23 ya shana de hkying 2:00pm aten hta KIA hpyen hpung ni shara la nga ai, Bang Wa hte Bang Gaw lapran na Nam Yi Hka maga de htu lung wa ai majaw, October shata 24 ya jahpawt hkying 5:00am aten hta Nam Yi Hka mayan kaw gasat gala majan byin ai.
Ndai Myen hpyen hpung ni hte sha, shana daw hkying 1:14pm aten hta Bang Wa hte Bang Gaw lapan na Nam Yi Hka mayan kaw numdaw 2 lang bai gap hkat ai re lam chye lu ai.
October shata 25 ya shani gaw 59 ning hpring KIO masat ninghtoi mung re. Mungmaw makau kaw galaw na matu hkyen da ai raitim, Myen Hpyen Dap ni, ya na zawn KIA Dap Dung 8 ginra de hpyen shamu shamawt htu lung wa ai majaw lamang hpe n galaw ai akyu sha hpyi la ai lam, Salang langai shana wa ai.
Ya aten hta KIA Dap Dung 8 ginra, Man Na mare grup yin hta Myen Hpyen Dap, Dapnu 88 na hpyen n gun 100 jan shamu shamawt du nga ai lam, shawng lam shi sawk ni kawn chye lu ai.
