Dap Hpawm ni hte Myen Hpyen Dap ni shara 3 kaw gasat gala majan matut byin
Mungmyit Sinli Ga ( Kachin Sub-state ) ginra ni hta TNLA, MNDAA pawng hpawm hpyen hpung ni hte Myen Hpyen Dap ni, August shata 24 ya shani hta shara 3 kaw gasat gala majan matut byin ai lam na chye lu ai.
Dai hpawt hkying 3:10am aten hte hkying 4 aten laman hta Sinli Hka Lum pawng hpawm shagyit ( Gate ) kaw TNLA hte MNDAA pawng hpawm hpyen hpung ni sa shang gap ai lam, buga na Salang langai tsun dan ai.
Shana daw hkying 2:00pm aten daram hta mung, Mungbaw Hka mahkrai kaw sin ai Myen Hpyen hte Lunghtang Pyi Tu Tsit pawng hpawm hpyen n gun 60 daram, Nam Um mare de yu wa ai hpe Kawng Hka mare makau kaw Dap Hpawm ni hkap shingla gasat dat ai kawn gasat gala majan byin ai.
Dai Myen Hpyen, Pyi Tu Tsit pawng hpawm hpyen hpung ni hte sha, Nam Um mare baw kaw Dap Hpawm ni kalang bai hkap gap ai. Ya na zawn majan byin nga ai majaw, Nam Um mare masha ni shinggan mung n mai pru, gara de mung n mai sa hkrit tsang nga ai lam, Nam Um mare na Salang langai tsun dan ai kawn chye lu ai.
Nam Gut, Namhkai hka modo lam mayan hku shamu shamawt nga ai Myen Hpyen hpung ni gaw August shata 24 ya jahpawt hkying 8:00am aten kaw nna, sinat kaji kaba gap shangoi nhtawm, dai na de hkying 5:00pm aten daram hta gaw Myen Hpyen modo 8, hpri gang Tank modo 2 hpung ni, Namhpaka mare kaw du shang taw sai lam, shawng lam shi sawk ni kawn chye lu ai.
