Dap shawa hkrumzup hpawng galaw

Ninggawn Daju Komiti kaw nna woi awn ai hte Magam Dap, Makan Dap shagu na magam gun ni hpe Laiza Muklum Manau Wang, Sinpraw Majoi Gawknu kaw February shata 11 ya jahpawt 10:00am aten hta, Wunpawng Mungdan Shanglawt Kongsi Ningbaw Kaba Nban La a (60) ning hpring rawt malan mungga madi shadaw woi hkaja ai dap shawa hkrumzup hpawng galaw la lu sai re.

Ninggawn Daju Komiti Tingnyang Up, Du Up Daju Maran Tawng La kaw nna hpa majaw rawt malan ra ai lam ni hpe tsun jahpra dan ai hta, anhte a rawt malan magam bungli hpe lawan shangut shakre awngdang lu hkra raiyang, madung bungli hpe madung zawn galaw ra ai gaw ahkyak dik re. Madung bungli hpe shingnan bungli zawn tawn nna hpyen wa a lum nai masa kata hta shang gayau achya awa rai nna galaw chyai nga ai rai yang anhte a rawt malan hkrun lam gaw grai naw galu na re ngu ai hpe atsawm sha chye na kau ra ai.

Madung bungli hta tatut shanglawm nga ai madang gaw tsa lam shadang 2% sha rai nna, madung bungli hpe shingnan bungli masa hku shanglawm nga ai amyusha ni gaw tsa lam shadang 98% rai taw nga ai re majaw, madung bungli rai nga ai rawt malan magam bungli hta, madu tai let tsap nga sai ni gaw mungshawa yawng grau nna tatut shanglawm wa lu hkra katsi kamang tai let lit la shakut sa ra ai lam, mungga hta mahta nna hpaji jaw tsun ai.

Hpawng hta, Ginjaw Komiti Dinggrin Salang, Salang Kaba Lama Gum Hpan kaw nna mung, magam dap ni hpe hpaw shagreng jat wa ai lam gaw, tinang a Mungdan tinang a Asuya langai hku nna ngang ngang tsap wa lu na matu re, htawm hpang e ngang grin ai Gumrawng Gumtsa Mungdan Gawgap lu na matu hte ngang kang greng grak galu kaba wa ai, masha lahkam dep ai Wunpawng Mungdan Shanglawt Asuya langai byin tai wa lu hkra matut nna lit la gawgap sa wa na lam tsun ai.

Hpawng hta, Magam Dap, Makan Dap shagu na magam gun dap shawa yawng marai 191 sa du shang lawm ai rai nna, Ningbaw Kaba Nban La a rawt malan mungga madi shadaw ai mungshawa, dap shawa hkrumzup hpawng ni hpe Wunpawng Mungdan Shanglawt Hpyen Dap, Dap Awn Daju, KIC Ningbaw Malai (I) hte Ginjaw Komiti Dinggrin Salang ni kaw nna wuhpung garan nhtawm, Dap Ba (3), Dap Ba (4), Mai Ja Yang, Hpalap Bum, Naru, Pa Jau hte Laiza Muklum ni hta galaw nga dingyang re lam chye lu ai.