DGA rung hpaw ai (50) ning hpring chyeju shakawn wunli la akyu hpyi hpawng galaw

Mungchying Uphkang Dap, DGA rung hpaw ai (50) ning hpring chyeju shakawn wunli la akyu hpyi hpawng hpe November shata 15 ya jahpawt hkying 9:00am aten hta Laiza Alen Bum Hpungwa Gawknu kaw galaw ai lam chye lu ai.

Rev. Sai La Rip (Anglican nawku hpung) kaw nna hpawng ap akyu hpyi ya ai. Salang Kaba Labya Tang Gun (DGA lithkam) kaw nna hkalum mungga hte akyu hpyi la ra ai lam hpe tsun ai. Dai hpang tingnyang kaw woi awn ai Wajau yan hte Hpung Up sara ni marai 7 hpe DGA lithkam hte lit nga ai salang marai 7 hku nna lagaw gashin ya ai lam galaw ai.

Wa Jau Fr. Joseph Nbwi Naw mara raw akyu hpyi ya ai. Rev. Lahpai Shing Rip kaw nna chyeju shakawn wunli la akyu hpyi ya ai. Rev. Dr. Hkalam Samson hku nna, Pahtau dum ai shaning (Shnr) Madu a sharawng awng ai shaning ngu ai ga baw kata hta Karai Mungga hpe htawn tsun ai.

“Karai Kasang lawm ai majan hta sadi dung ra ai, myit hte hkum hkrang hpe san seng ai byin hkra anhte shani shagu hkawm sa ra ai. Mungdan hpe uphkang ai asuya mungshawa hpe uphkang ai ngu gaw Karai Kasang a hkringmang ni re. Kaja ai bungli galaw ga, nkaja ai hku sa galaw sai kaw na gaw mungshawa ni garu wa ai dai majaw mungshawa ni a nsen madat ga, mungshawa hte rau nga ga, mungshawa a matu machyi hkam, sum hkam, si hkam rai galaw yang gaw mungshawa yawng aw law ai Wunpawng Mungdan Asuya sha n ga tara rap ra simsa grin ai mungdan langai tai wa na re” nga nna tsun ai.

DGA makam masham komiti ni hku nna Rev. Dr. Hkalam Samson, Wa Saradaw Remon Sumlut Gam, Rev. Chyang Maja Tu Shan, Laiza buga hkalup hpung, Laiza buga Kahtawlik hpung, Laiza buga Anglican nawku hpung, Nawng E Hku hkalup hpung, Woi Chyai IDPs hkalup hpung, Je Yang hkalup hpung hte chyeju dum ging ai Hpung Up ni hpe chyeju dum lit jaw ai lam galaw ai.

Wa saradaw Remon Sumlut Gam kaw nna shaman ya ai hpang manhkrum lu sha jawm sha nna DGA rung hpaw ai 50 ning hkring Ja jubeli chyeju shakawn wunla la akyu hpyi hpawng hta saw shaga da ai manam ni, sut du lauban ni, makam masham nawku hpung woi sara kaba ni, magam dap, makan dap na myitsu salang ni hte mungshawa kanu kawa ni yawng marai 700 daram wa du shang lawm ai hte angwi apyaw galaw la lu sai lam chye lu ai.

November shata 14 ya shana hta DGA (50) hpring ten du sai, ngu ai mahkawn ga baw hpe ka hkrang shing jawng ai wuhpung ni gaw, Laiza,Woi Chyai, Je Yang, Hpun Lum Yang, Dum Bung, Maga Yang hte Sha-it Yang ni shing jawng ai hta Laiza ni No.1 kumhpa Ks 2,500,000. Woi Chyai No.2 kumhpa Ks 2,000,000. Maga Yang No.3 Ks 1,500,000 ni lu ai rai nna, shang lawm kumhpa Ks 500,000 re lam chye lu ai.