Dima mare na ramma marai 2 a moimang hpe bai mu tam la lu
Mungmyit Sinli Ga (Kachin Sub-State) ginra kaw lai wa sai July shata 25 ya shani hta gumshem Myen hpyen dap hte TNLA dap ni gasat poi byin ai majaw, gumshem Myen hpyen ni rim woi mat ai, Dima mare na ramma marai 2 a moimang hpe July shata 31 ya shani hta bai mu tam la lu ai lam chye lu ai.
Rim hkrum ai Dima mare na ramm yan gaw, July shata 25 ya shana daw hta Kutkai de arung arai sa mari la nna, mare de bai wa ai shaloi Kawng Wing lam numshe kaw, gumshem Myen hpyen ni rim woi mat nna, shan lahkawng jawn lang ai nawku hpung na modo hpe mung, gumshem Myen hpyen ni gawt mat wa ya ai hte ya du hkra sagawn nlu shi ai lam, ginra masha ni tsun ai kaw na chye lu ai.
Dima mare ramma yan a moimang hpe gaw wan nat nhtawm, dai shani hta sha, gumshem Myen hpyen ni a, myawk si hkra nna si mat ai Balawng la hte rau Sun Lung mare hte Ya Htaik lapran, deng 3 tsan ai shara kaw lup makoi da ai hpe mare masha ni sa mu tam la ai lam chye lu ai.
Rim hkrum ai ramma yan gaw asak 27 ning, Shadang Shanghtin Brang Awng @ La Lar hte asak 25 ning, Shd. Ginraw Tu Ja shanhkau majing majing mung rai nga ai. Makoi mayang akyuhpyi hpawng hpe. August shata praw 3, bat hpang hpang 4 ya shani hta Dinma mare nawku hpung wang kaw galaw nhtawm, lupding lupra de makoi mayang na re lam, buga masha ni kaw na chye lu ai.
July shata 30 shani hta mung, Mungmyit Sinli Ga ginra, Namhpakka kaw dap jung shara jahkrat nga ai, Hk.L.Y (123) kata na gumshem myen hpyen ni gaw, Sun Lang mare na asak 30 ning re ai Ma kanu hpe mazut roirip nhtawm, asak 20 ning re ai Ma hkum kanu hpe gaw, madu wa hkrap ai hte grai hpyi nyem tangban ai majaw, mazut roirip ai lam n galaw ai sha tawn kau da ai re lam, ginra shiga lawk kaw na chye lu ai.
