Dingdung daw Dap Hpawm ni hte Myen Hpyen Dap ni gasat gala majan matut byin
Mungmyit Sinli Ga ( Kachin Sub-state ) KIA Dap Ba 4 hte Dap Ba 10 ginra, shara lahkawng hta August shata 26 ya shani Dap Hpawm hpyen hpung ni hte Myen Hpyen Dap ni laja lana gasat gala majan matut byin nga ai lam chye lu ai.
Dai hpawt hking 9 aten kaw nna dai na de hkying 2 aten daram du hkra, Nam Hpalun Bum kaw Dap Hpawm ni hte Myen Hpyen Dap ni laja lana gap hkat ai. Myen Hpyen ni gaw Kuthkai kawn Hpyen modo 3 hta hpyenla hpring hpring htaw nna gap hkat ai shara de, n gun jat lung wa sai lam, ginra shi sawk ni kawn chye lu ai.
Hkying 1:00pm aten hta mung, Kuthkai daw 8 Golf ginsup pa makau kaw TNLA hte Myen Hpyen Dapnu 99 ni minute 50 daram gap hkat ai. Kuthkai kaw dap jung ai Myen Hpyen Dap Hk.L.Y 45 hte Hk.L.Y 241 Dap ni kaw nna majan byin ai shara de laknak kaba hte gap bun ai lam, buga masha ni kawn chye lu ai.
Dingdung daw Dap Hpawm ni rai nga ai MNTJP/MNDAA, PSLF/TNLA hte ULA/AA ni kaw nna August shata 25 ya laban shani mungshawa ni hpe shadum laika shapraw shana ai hta ya aten gasat gala majan byin nga ai re majaw, hkrun lam hkawm mungshawa ni, shiga la ai ni hte shinggyim nau na hkye mawai hpung ni kawn hkrun lam hkawm sa ai rai yang san sagawn nna sadi sahka hkawm sa na hte shimlum lam lu na matu, Dap Hpawm ni hpe matut mahkai hkri dun sa wa na matu, shana lajin laika shapraw da ai lam chye lu ai.
