Dingdung daw Dap Hpawm ni hte Myen Hpyen Dap ni gasat gala majan matut byin nga ai majaw mungshawa ni hpyen koi yen
Mungmyit Sinli Ga ( Kachin Sub-state ) KIA Dap Ba 4, Dap Ba 6 hte Dap Ba 10 ginra ni hta dingdung daw Dap Hpawm TNLA, AA, MNDAA hpyen hpung ni hte Myen Hpyen Dap ni shani shagu ngu na gasat gala majan matut byin nga ai majaw mungshawa ni hpyen koi yen nga ai lam na chye lu ai.
August shata 21 ya shana Nam Gut hte Nawng Swi lapran kaw shana tup, Dap Hpawm ni hte Myen Hpyen Dap ni gap hkat ai, dai ni August shata 22 ya jahpawt hkying 4 hte hkying 5 aten hta mung, Kuthkai lawu Man Pying mare kaw TNLA hte Myen Hpyen Dapnu 88 ni hte gasat gala majan byin ai.
Matut nna dai na de hkying 1 hte hkying 2 lapran aten hta Namhkam Muklum ntsa Kawng Wai mare kaw TNLA hte Myen Hpyen Dapnu 99 ni gap hkat ai re lam, shawng lam shi sawk ni kawn chye lu ai.
Myen Hpyen Dap kawn gasat gala majan byin nga ai shara de hpyen n gun matut jat nga ai sha n ga, ya aten hta Nam Gut mare mayan hta Hpyen htaw modo 25 hte Tank modo 6 du taw nga ai lam, ginra shi sawk ni kawn chye lu ai.
August shata 15 ya shani kaw nna gasat gala majan matut manoi byin nga ai re hte hkawm sa hkawm wa modo ni hpe pat da ai majaw, Muse hte Kuthkai lapran na mare kahtawng ni hta malu masha yak hkak wa ai lam ni byin wa ai rai nna, Nam Um hte Hku Mung mare na gat seng gaji hkan dut ai Phone bill hte Sau, Shakau zawn re ni gaw ma mat wa ai daram byin nga ai lam, Salang langai tsun dan ai.
Ya aten hta gasat gala majan a majaw, Paju, Man Ai, Law Mun, Nam Ba Chi, Man Pying, Kung Sa, Man Nawng hte Hku Lung mare kahtawng 8 na mungshawa marai 800 daram mung, Sinli, Ga Leng, hte Kuthkai maga de hpyen koi yen nga ai lam chye lu ai.
