Du Up Daju, Nbang Bum Sinwa Naw machyi makaw hkrum nna si wai mat sai
Wunpawng Mungdan Shanglawt Hpung, Ginjaw Komiti Salang majing, Du Up Daju, Nbang Bum Sinwa Naw asak (81) ning gaw, mungkan ga na ana ahkya machyi makaw hte November shata (26) ya jahpawt hkying 9:54am aten, Laiza Muklum lawk (4) shi a dum nta kaw Madu Yesu hta yup pyaw si wai mat wa sai lam chye lu ai.
Shi a hkum tsawp moimang hpe November shata (26) ya shana daw hkying 2:00pm aten hta Laiza Muklum Lupding Lupwa kaw hpyen htung hte maren makoi mayang sai lam chye lu ai.
Du Up Daju, Nbang Bum Sinwa Naw gaw, Mungdan Magam bungli hpe shaning (58) ning gunhpai shakut shaja lai wa sai rai nna, magam bungli hpe naw matut gunhpai nga ai kaw machyi makaw hkrum nna asak si sum mat ai re.
Du Up Daju, Nbang Bum Sinwa Naw gaw, shawng de Hka Hku Mung Ginwang, Myitkyina Sumpra Bum Mawdaw lam, Kawa Pang mare kaw nga lai wa sai Salang Nbang Bum Ja Naw hte Jan Nlam Kaw yan a kasha re hpe chye lu ai.
