Duwa Lahtaw Hkun Seng @ Hkun Jing nnga mat
Mungmyit Sinli Ga (Kachin Sub-state), Mungmau Ginwang, Jinghpaw Wunpawng Hkalup Hpung Muse Buga, Hpung Daw (3) kaw shanu nga ai, Duwa Lahtaw Hkun Seng @ Hkun Jing asak 68 ning gaw April shata praw 9 ya shana hkying 11:32pm aten hta Madu Yesu hta yup pyaw mat wa sai lam na chye lu ai.
Duwa Lahtaw Hkun Seng @ Hkun Jing gaw lai wa sai shata 5,6 daram kaw nna hkumhkrang hkamja lam nnga wa ai majaw, dum nta kaw tsi tsi hkam la nga ai ten nnga mat ai re.
Hkumtsawp moimang hpe April shata 11, bat hpang 6 ya shani hkying 11:00am aten hta hpung daw (3), Humun lawk, H-3/77 Dujan Maran Nang Hkam hkannu ni a dum nta kaw akyu hpyi hpawng galaw nna Hkristan lupding lupwa de makoi mayang na re lam chye lu ai.
Duwa Lahtaw Hkun Seng @ Hkun Jing gaw, Muse Ginwang Htunghking Ningbaw magam lit hpe 10 ning jan gunhpai ngut ai hpang, Sam Mung Jinghpaw Wunpawng Htunghking Hte Laili Laika Hpung Ginjaw a ningtau ningbaw magam lit hpe mung gunhpai lai wa sai rai nna, Wunpawng Amyusha Mungbawng Rapdaw (WMR) kaw mung, ningbaw magam lit hpe htam 2 hkawt 6 ning jan gunhpai lai wa sai rai nga ai.
