ECCD Ma shapan jawng hpe Home School ladat hte Sharin na
Wunpawng Mungdan Shanglawt Asuya, Amyu Shayi Hpung Ginjaw kaw nna lit la yu nga ai ECCD Ma shapan jawng hpe COVID-19 ana zinli byin nga ai aten ladaw re majaw 2020 ning August shata kaw nna December shata du hkra Home School ladat hte sharin sa wa na re lam chye lu ai.
Ndai ECCD jawng hte seng nna July shata 31 ya shani Amyu Shayi Hpung Ginjaw kaw nna ndau da ai hta, Covid ladaw re majaw Ma ni a hkamja shimlum lam hpe ningshawng tawn let home school ladat hte galaw sa wa ai re lam, Jawng hpaw ai lam hpe August shata 7 ya shani kaw nna Laiza muklum kata nga ai jawng (4) hpe shawng nnan sharin sa wa na re lam chye lu ai.
Amyu shayi hpung ginjaw kaw nna kanu kawa matsun ngu ai laika buk langai galaw da ai rai nna, dai laika buk hpe jawngma kanu kawa ni hte Ma shalet jawng sara magam gun ni htejawng komiti ni hpe langai hpra jaw da nhtawm, laika buk kaw rawng ai laika si ni hpe yawng jawm hti nna, Ma ni bawng ring wa hkra gara hku garum na ngu ai ladat ni hpe jawm gahkyin la nhtawm, kanu kawa ni hpe laika buk a masa lam ni hpe sanglang dan na re nga nna Amyu shayi Ginjaw Rung Kaw ECCD Lithkam Saranum Nhkum Hkawn Ra tsun ai.
“Ndai laika buk kaw lam 2 sha nga ai lam langai gaw Ma ni ndai hku re, bai lam langai gaw nang ndai hku galaw u ngu ai laika buk re, Kanu Kawa ni hpe laika buk a lam hpe sang lang dan ngut ai hpang, Ma shalet jawng shagu na sara ni gaw ndai laika buk hta mahta nna, Ma ni a matu bat mi na mahkyen hpe shanhte galaw mat wa nna, saranum ni gaw komiti ni lawm ra yang lawm rai nna Ma ni hpang de bat mi hta kalang nta de du hkra sa nna, kanu kawa ni hpe ndai bat gaw nang ndai hku galaw u yaw Ma hpe ndai laika hti dan u, ndai maumwi hkai dan u, ndai mahkawn sharing ya u, ndai hpan sumla woi soi u, ndai zawn hkum hkrang a shamu shamawt ai lam hpe woi galaw u, ndai lam ni rai na” nga nna tsun ai.
Home School ladat hpe shawng nnan lang galaw ai re majaw masan sa ai lam gaw nnga na re raitim, kanu kawa, sara ni hte komiti ni aten lu jaw ai Ma ni gaw atsawm sha sharin la lu nna, aten nlu jaw ai Ma ni gaw atsawm nlu sharin la na re sha n-ga Covid aten na wa yang Ma ni langai hte langai shai hkat wa mai ai lam maram da ma ai re.
Laning mi tup jawng nhpaw na malai ndai hku ladat hte raitim loi mi lu garum na re ngu ai hpe myit mada let hkyen lajang ai lam, COVID- 19 ana zinli a majaw Hpaji Jawng ni hpaw wa ai shaloi Ma shalet jawng gaw nlu nhpaw ai majaw myit tsang ai lam ni nga na re.
Ma ni COVID-19 ana makawp maga ritkawp tara ni hpe hkan sa na matu nloi ai hpe myit dum shangun mayu ai lam, langai hte langai na tsan gang shadang hpe mung Ma kaji ni gaw nlu hkan sa na re, ndai ritkawp tara hpe hkan sa lu ai raitim, Jawng kaw arung arai alaw alam nnga ai re majaw ginsup rai ni, Ma ni dung ai shara ni hpe jasan jaseng lu na matu mayak nga ai lam, Saranum Nhkum Hkawn Ra tsun dan ai kaw na chye lu ai.
Wunpawng Mungdan Shanglawt Asuya Amyu Shayi Hpung kaw nna Laiza Muklum kata nga ai Ma Shapan Jawng (4) hte jarit mayan hpyen yen dabang hkan na Ma Shapan Jawng (20) hpe lit la yu nga ai re lam chye lu ai.
