Electronic, Mobile phone byeng gram hpaji sharin sa wa na
Myitkyina, Dap Kawng Mare, Htoi Electronic, Mobile Phone Center kaw hpaw sharin nga ai, pang 24 lang na Electronic, Mobile phone byeng gram sharin ai hpaji hpe March shata 20 ya shani kaw nna, sharin sa wa na re lam chye lu ai.
Electronic hte Mobile Phone ginhpan hpe san san sharin ya na rai nna, aten chyarang hpe jahpawt hkying 8:00am kawn shana de hkying 6:00pm du hkra hpung 4 garan let, sharin sa wa na re hpe chye lu ai.
Wunkat hpaw ai a yaw shada lam hpe Htoi Electronic, Mobile Phone Center a Sara, Hpauje Naw Htoi tsun ai hta “Tinang a kan bau magam bungli mung re, grau na gaw anhte Wunpawng amyu sha ni a matu, ya kaba wa ai ramma ni majoi dam dam wam wam rai nnga na matu, bungli hte hkrak rai na lu galaw na matu, bungli madu sut madu ni law law byin tai wa na matu yaw shada let, ndai magam bungli hpe galaw ai re” nga tsun ai.
Electronic hpaji hpe shata 3 sharin ya ai rai nna, shata 3 ta tut bai shang ai lam, Mobile Phone hpaji hpe gaw ta tut hte hpawn shata 3 sharin ya ai hta chye hkra tinang hkrai seng lu hpaw hkra, sharin ya ai re lam Sara matut tsun ai.
Sharin shabrai hku na marai langai Electronic ginhpan hta 50,0000Ks, Mobile Phone ginhpan hta 40,0000Ks bang ra na rai nna, ginhpan lahkawng hpe sharin na nga ni na matu gaw, 10,0000Ks shayawm ya ai lam chye lu ai.
Jawngma marai 10 hpe sha hkapla sa wa na rai nna, tsan ai de na sa ai ni a matu, nga shara lajang ya ai hte shat lu sha a matu shata mi 10,0000Ks jaw ra ai lam chye lu ai.
