Ga kaput lawm mat ai wunpawng ramma marai 4 a moi mang hpe tam sagawn nga
Hpakant Maw Wan Kaji, Lung Seng htu ai shara dingsa kaw December shata 23 ya shana daw hkying 2:30pm aten hta ga shingbut gyi wa ai majaw ga kaput lawm mat ai Wunpawng ramma marai 4 a moi mang hpe garai nmu tam shi ai lam chye lu ai.
Ga shingbut gyi ai kaw lawm mat ai ramma ni gaw Salang Labang Zau Hpan a kasha asak (29) ning re ai Salang Labang Rep Seng Naw, Salang Nhkum Naw Grawng a kasha asak (35) ning re ai Salang Nhkum San Awng, Salang Lamung Doi Awng a kasha asak (25) ning re ai Shadang Lamung Sut Seng, Salang Kumrai Hka Li a kasha asak (33) ning re ai Salang Kumrai Naw Hkrang ni rai nna Salang Lum Ze a kasha Shadang Ze Lum gaw hkra maga lata kaw hkala hkrum ai majaw ya aten hta Hpakant mungshawa tsi rung hta tsi tsi hkam la nga ai re.
“Shanhte lung seng htu taw nga ai nhkun shingdu kaw na ga shingbut gyi wa ai majaw shanhte hpe kanawng jahkrat kaput kau ai ga rai nga ma ai. Marai manga re ai hta marai langai gaw hkala ai, marai mali gaw di hkrat bang mat wa ai re. Ga shingbut hte hka de di hkrat bang mat wa ai re majaw ndai marai mali a moi mang hpe gaw ya du hkra tsep kawp nmu tam shi ai” nga nna Hpakant Myusha zinlum Hpung Amu Madu Salang Dashi Naw Lawn tsun ai.
“Asuya kaw nna mung hkum galaw mu ngu na tsun da ai gaw rai nga ai. Raitim mung mungshawa ni gaw lu na sha na tam sha, galaw sha ra ai re majaw Company ni htu shatsaw da ai shara hkan e sha lung nna tam sha ra ai mabyin rai taw nga ai hku re. Dai hpe Asuya e mung nlu gawt ya ai, dinghkrai galaw sha na shara mung nlu masat ya ai re majaw gyi na zawn re n hkun hkan htu sha ra ai hku re. Company hpe hkrai shara jaw nna mungshawa ni a matu dinghkrai tam sha mai ai shara nlu jahkrat ya ai. Asuya kaw nna dinghkrai galaw sha na shara masat ya na hku ndau sai raitim bungli masing tara nlu shapraw ai rai nna galaw ya na matu loi yak sam ai, dai re majaw ya na zawn mabyin ni jahkring hkring byin wa ai ga rai nga ai” nga nna Salang Dashi Naw Lawn matut tsun ai.
Ga shingbut hta gyi lawm mat ai ni a moi mang hpe Seng ang ai mare salang ni kaw nna matut sagawn tam nga dingyang re.
Hpakant lung seng htu ai shara ni hta November shata kaw nna Decembet shata du hkra rai yang, shata 2 laman si ai wunpawng ramma marai 10 jan re sai lam chye lu ai.
Hpakant ginra hta nga ai lung seng htu shara gaiwang ni hpe dai ning July shata kawn hpang nna jahkring da na matu asuya kaw nna matsun laika shapraw da ai re hpe mung chye lu ai.
