Ga Ra Yang hpyen yen ni tinang a mare lamu ga makawp maga lu na matu dum nta wang jasan jaseng lam galaw

Ga Ra Yang hpyen yen ni tinang a mare dum nta lamu ga sun wang ni makawp maga lu na matu mare dum nta wang jasan jaseng ai lam hpe March shata 11 ya shani kaw nna galaw hpang nga sai lam na chye lu ai.

Ga Ra Yang mare kata bawm tam jasan ai lam hpe Myen Hpyen Dap kawn February shata 15 ya shani kaw na March shata 9 ya laman galaw shangut ya sai rai nna, dum nta gawgap na matu grai naw yak hkak ai majaw, ya aten mare wa jasan jaseng, mare wa sin makawp maga ai lam galaw hpang wa ai re nga nna Ga Ra Yang mare masha langai tsun ai.

Ya aten Ga Ra Yang mare masha ni tinang mare buga de bai nhtang wa na matu jahpan bang da ai htinggaw yawng 400 jan nga ai lam chye lu ai.

Ya na zawn hpyen yen mare ni tinang mare dum nta de bai nhtang wa na matu hkyen lajang wa ai lam gaw, Gumshem ai Myen Hpyen Dap kawn Mungdan a daru magam ahkang aya garai njum tek shi ai aten kaw nna, KBC, KHCC kaw nna masing jahkrat woi awn galaw nga sai re lam chye lu ai.

Photo Credit; Ga Ra Yang Nsen