Ga shingbut gyi ai majaw, mungshawa gyi kaput hkrum
Hpakant kaw ga shingbut gyi wa ai majaw, mungshawa gyi kaput hkrum ai lam chye lu ai.
February shata 16 ya shana hkying 9:30pm aten daram hta Hpakant Kate maw na, Ever company kaw ga shingbut gyi wa ai majaw, mungshawa marai 20 jan daram gyi kaput lawm mat ai lam, ginra masha ni kaw na chye lu ai.
Ya aten hta seng ang ai ni hku nna mung, ga shingbut gyi kaput lawm mat ai mungshawa ni hpe hkye mawoi ai lam galaw nga ai hta marai gade asak si sum nna marai gade hkala hkrum ai lam nchye lu shi ai re.
Hpakant ginra hta ya na zawn, ga shingbut gyi kaput ai lam ni jahkring hkring byin nga ai sha n-ga, KIA pawng hpawm hpyen hpung ni hte gumshem Myen hpyen dap ni gasat gala majan mung byin nga ai rai nna, gumshem Myen hpyen dap kawn, laknak kaba, nbungli, drone ni hte hkrup mara gap gasat bun nga ai shara re hpe chye lu ai.
