Ga shingbut gyi ai majaw mungshawa ni a dum nta lawm mat

Hpakant Ginwang Gwihka mare makau kaw daihpawt hkying 3:30am aten hta ga shingbut gyi wa ai majaw, mare masha ni a arung arai dum nta 12 hte company ni a nta 2, backhole mawdaw 1 gyi lawm mat ai lam chye lu ai.

Ndai ga shingbut gyi ai shara gaw laiwa sai shaning kaw nna ga ga kapran taw nga sai shara re. July shata praw 2 ya shani hta byin lai wa sai ga shingbut gyi ai kaw nna, mare makau hkan mung ga ga kapran ai lam byin hpang wa sai rai nhtawm ya na zawn marang kaba htu ai majaw ga gyi bang wa ai re lam jauman masha ni tsun dan ai kaw nna chye lu ai.

“ dai nta 12 gaw ga gyi ai hta lawm mat ai re. Nta nlawm tim bai ga kapran wa ai shara hkan na mare masha ni mung nta arung nrai ni htawt sit rai nna sheng mawng sheng hkang rai naw byin taw nga ma ai.” nga nna Hpakant amyu sha zinlum hpung Amu madu Dashi Naw Lawn tsun ai.

Matut nna mung  “Ga gyi hkang hkang da sai re majaw matut manoi gyi wa na sha rai nga ai. Ya gaw mare de gyi shang wa sai ga rai nga ai. Na wa jang gaw dai mare yawng gaw htawt sit wa ra na re” nga nna mungshawa ni a myit tsang nga ai lam hpe Dashi Naw Lawn matut tsun dan ai.

Ga shingbut gyi lawm mat ai nta 12 hte ga ga kapran wa ai majaw hkrit tsang let htawt sit ai mungshawa ni yawng marai 50 daram re.

Ya aten hta seng ang ai asuya ni hku nna htawt sit lajang ya ai lam nnga shi ai raitim mare salang, kanu kawa ni a hkyen lajang matsun ai lam hte tinang a jinghku jingyu dum nta ni hkan naw htawt sit shanu nga ai re hpe chye lu ai.

Gwi Hka mare ting hta rai yang mungshawa htinggaw 1000 jan nga ai rai nna ndai mungshawa ni a matu mung grai myit tsang ra nga ai nga nna jauman masha ni tsun dan ai kaw nna chye lu ai.