Ga shingbut hte gaput si mat ai masha ni hpe Jade Land Company ni marai langai hta Kyats 1,500,000 jaw
Hpakant Maw Mau Bum makau na Jade Land Company kaw, January praw 4 ya shana maga hkying 3:15pm aten hta ga shingbut gyi wa ai majaw masha marai 6 si nna, marai 2 gaw hkala hkrum ai lam chye lu ai.
Ndai amu hte seng nna, daini January praw 5 ya shani, Maw Mau Bum mare uphkang rung kaw, si hkrum ai nta masha ni hte mare salang ni hku nna, Jade Land Company ni hpe zuphpawng woi galaw nhtawm, hkala hkrum ai yan hpe gaw gumhpraw jaw ai lam nnga ai, si mat sai ni hpe gaw, marai langai hta Myen gumhpraw Kyats 1,500,000 ( Sen Shi Manga ) hpra hte bungli hparan jasan ngut sai lam, Maw Mau Bum mare na salang langai shana wa ai.
Si mat ai ni gaw, Shadang Nding Naw Asak 45 ning, Shadang Sana Hkun Seng Asak 27 ning, Shd Makawng Naw Asak 23 ning, Shd သားငယ္ Asak 25 ning, Shd Hkun Awng Asak 26 ning, Shd Seng Awng Asak 24 ning ni rai nna, makoi mayang lam hpe daini galaw kau sai lam, salang wa tsun ai.
Si hkala hkrum ai yawng marai 8 hta na Maw Mau Bum mare na marai 2 si, 2 hkala nna, ngam ai marai 4 gaw Maw Wan Kaji mare na re lam, hkala hkrum ai yan hta Slg. Nta Galu Sinwa Naw gaw nau nsawng ai majaw nta kaw sha tsi tsi nga ai, Slg. Tingbu Naw gaw hkra lata daw mat ai majaw ya aten, Nam Ma mare kaw Bum tsi tsi nga ai lam chye lu ai.
