Galeng jawng hpe TNLA ni pat kau ya ai lam galaw

Mungmyit Sinli Ga (Kachin Sub-state) ginra, Galeng laika sharin hpaji jawng hpe TNLA ni sa pat kau ya ai lam galaw ai hpe chye lu ai.

June shata 23 ya shana hkying 9:30pm atan daram hta TNLA hpyen n-gun (50) daram, Galeng jawng wang kata shang wa nna, jawng wang chyinghka, jawng gawk chyinghka ni hpe sa pat kau ya ai lam galaw ai hpe ginra masha langai tsun ai.

Bai nna dai jawng kaw magam gun nga ai jawng sara/num ni hpe mung, jawng wang kata kaw nna atik anang gawt shapraw ai lam galaw ai rai nna, jawng wang kata kaw na npru ai ni hpe shanhte a rung de rim woi mat wa na nga nna jahkrit ai lam ni galaw ai hpe chye lu ai.

Ndai zawn galaw ai hta magam gun jawng sara/num ni dai shana jang jawng wang kata kaw nna pru mat wa sai rai nhtawm, jawng hpaw na rai yang TNLA kaw na ahkang hpyi ra na hte shanhte a tara hkan nna she jawng hpaw mai ai lam tsun ai hpe chye lu ai.

Ndai manghkang gaw laiwa sai May shata 28 ya shani jawngma mying hta hpang ai kawn byin hpang wa ai rai nna, June shata 23 ya shana gaw TNLA ni jawng chyinghka, jawng gawk chyinghka ni hpe sa pat kau ya sai re lam chye lu ai.