Game ginsup ai seng 4 hpe mare kanu kawa ni hte ramma ni sa adup jahten kau ya

Mungmyit Sinli Ga ( Kachin Sub-state ) KIA Dap Ba 10 Dap Dung 2 ginra, Mungji Ginwang, Bang Ngu Ninghtawn, Tamunye Muklum kaw hpaw tawn ai Nga gap game ginsup ai seng 4 hpe November shata 14 ya shani hkying 10:30am aten hta mare na Kanu Kawa ni hte Ramma ni yawng marai 60 daram sa adup jahten kau ya ai lam chye lu ai.

Nga gap game seng nga ai majaw, jawngma ni jawng hprawng hprawng ai, Ramma ni, dinghku num/la ni grai hten wa ai. Game seng hpe nhpaw na matu Kanu Kawa ni kawn, seng ang ai mare uphkang salang ni hpe lang hte lang tsun yu ai raitim, lit la hkum pat kau ya ai lam nnga ai majaw, shawa n-gun hte sa adup jahten kau ya ai re lam, Tamunye Muklum na salang langai tsun dan ai.

Game seng madu nkau gaw Pyi-Tu-Tsit hking lang nna kadai hpe hpa zawn nnawn ai sha n-ga mare salang nkau sa tsun jang nhtang de jahkyit shagyeng wa ai nga nna, salang wa matut tsun ai.

Ndai Nga gap game seng hpe Tamunye Muklum hta lai wa sai 2015 ning kaw nna hpaw hpang wa ai re hpe chye lu ai.