Gaming Loi Dau Ginwang kaw tara rung hpaw hpawng galaw
Dingda Ginwang Ginjaw, Gaming Loi Dau Ginwang ni a tara rung hpaw hpawng lamang hpe August shata praw 6 ya shani hkying 10:00am aten galaw la lu sai lam chye lu ai.
Tara rung hpaw sa wa ai yaw shada lam hpe Gaming Loi Dau Uphkang Du, Tara Rung Ningbaw Salang Kaba Myitung Zung Bawm tsun ai hta
“Anhte mungchying mungshawa ni a amu bungli hkrat sum lam, myit ndik myit n ngwi npyaw lam, sum machyi hkrum ai lam nnga hkra, tara rung kaw na joi jang tai let, je yang dawdan hparan sa wa lu na matu madung kaba yaw shada ai re” nga nna tsun ai.
Dingda Ginwang Ginjaw kata ginwang (6) nga ai hta na nkau ginwang ni hta gaw tara rung hpe hpaw la lu sai rai nna, Gaming Loi Dau ginwang kaw gaw, August shata praw 6 ya shani kawn tara rung hpaw hpang sa wa ai re lam chye lu ai.
Tara rung hpaw hpawng lamang hta Magam Dap, Makan Dap hkan na magam gun ni hte mungchying mungshawa yawng marai 100 jan sa du shanglawm ai hte galaw ngut kre la lu sai lam chye lu ai.
