Gang Dau Yang gumshem Myen hpyen dap hpe KIA hte pawng hpawm hpung ni sa htim gasat zing la
Myitkyina, Manmaw lam, Gang Dau Yang kaw dap jung nga ai gumshem Myen hpyen dap Hk.M.Y (387) dap hpe October shata 31 ya jahpawt hkying 6:00am aten daram kaw nna, KIA hte hpawng hpawm hpung ni sa htim gasat ai lam chye lu ai.
Gasat poi byin ai hkying hkum masum daram na ai hpang, gumshem Myen hpyen dap hpe padang dip zing la lu sai lam, shawng lam na lit nga ai salang ni kaw na chye lu ai.
Gumshem Myen hpyen ni gasat poi byin ai shara de, Jet Fighter hte bawm wa jahkrat bun ai sha n-ga, Shwe Nyaung Pin kaw dap jung ai Hk.M.Y (321) dap kaw nna mung, laknak kaba ni gap bun ai lam chye lu ai.
Gumshem Myen hpyen dap ni gap dat ai sinat kaba si, Ja Hta mare kaw wa hkrat kapaw ai majaw, dum nta htinggaw 6 wan hkru mat ai lam chye lu ai.
Ya aten Mali Yang gumshem Myen hpyen dap hpe mung, KIA hte pawng hpawm hpyen hpung ni matut gap gasat nga ai lam chye lu ai.
Mungmyit Sinli Ga (Kachin Sub-State), KIA Masat (4) Dap Ba, Masat (8) Dap Dung ginra, Mung Maw, Nam Hai gumshem Myen hpyen dap hpe October shata 30 ya shani padang dip zing la lu sai lam chye lu ai.
