Gasat gala majan a majaw, Man Kawng mare masha ni, ni nawn ai mare de hprawng yen
Mungmyit Sinli Ga (Kachin-Sub-state) Munggu Ginwang, KIA Dap Ba 6, Dap Dung 36 ginra, Man Kawng mare ntsa kaw, September shata 11 ya shani kaw nna, MNDAA hte AA dap hpawm ni hte Myen hpyen dap ni gasat gala majan byin ai majaw, Man Kawng mare masha ni gaw, ni nawn ai Man Pying mare de hprawng koi yen nga ai lam na chye lu ai.
“Mani hpawt hkying 9:00am ten kaw na rai nga ai. Ndai Myen hpyen dap ni du wa sai nga jang she hpa mi rai rai ndai Man kawng mare gaw nam shalawng hte grau ni ai re majaw, majan byin wa na masa mung nga ai. Grau nna gaw machyu pala yen ai hku nna nang de hprawng yen ai ga rai nga ai” nga nna Man Pying mare salang Maran Tang Nau tsun dan ai.
Man Kawng mare kaw htinggaw 50 daram hte mungshawa n-gun 200 jan daram nga ai re. Ya aten Man Pying KBC nawku hpung jawng wang hta shanu nga ai rai nna, nkau mi gaw tinang a jinghku jingyu ni hkan shanu nga ai re lam chye lu ai.
Daini September shata 12 ya jahpawt hkying 9:30am aten hta mung, KIA Dap Ba 6, Dap Dung 36 uphkang ginra, Man Kawng mare ntsa kaw Dap Dung 36, shawng lam hpyen hpung ni hte Myen Hpyen Dap, Hk.L.Y 83 hte Hk.M.Y 105 dap na pawng hpawm hpyen hpung ni gasat gala majan bai matut byin sai re.
“Anhte KIA Dap Dung 36 ni nga ai ginra de Myen hpyen ni htu shadut lung wa ai majaw ninghkap gasat poi byin ai ya gaw, Myen ni htingnut mat wa masai bai lung wa jang naw ngoi na re” nga nna shawng lam na salang langai tsun dan ai.
Man Kawng mare masha ni tinang a, nta de bai wa na hte seng nna Man Pying mare salang, ya na zawn tsun dan ai.
“Ndai mare makau grup yin ni hta sinat mahku nsen nngoi sai, Man Kawng mare makau hkan, Myen hpyen dap ni nnga sai nga jang gaw, anhte yawng kalang ta bai mai woi wa na hku rai nga ai”
Ya aten hta Myen Hpyen Dap, Hk.L.Y 83, hte Hk.M.Y 105 pawng hpawm hpyen hpung ni gaw, Man Pying mare de yawng bai du taw nga sai hte mare masha ni mung grai myit tsang nga ai lam buga masha ni kawn chye lu ai.
