Gasat gala majan a majaw, mara kata mungmasha marai ( 2 ) hpe Myen hpyenla ni adup zing ri da
Mungmyit Sinli Ga ( Kachin Sub-State ) KIA Dap Ba ( 4 ), Dap Dung ( 34 ) ginra kaw shamu shamawt nga ai Myen hpyen dap Hk.L.Y ( 113 ) na hpyen hpung hte TNLA hpyen hpung ni, July praw 6 ya shana maga hkying 4:00pm hte hkying 5:00pm aten laman, Kyoban hte Da Bang mare lapran kaw gasat gala majan byin ai lam na chye lu ai.
Gasat majan byin ai hpang Myen hpyen ni gaw, Da Bang mare de sa nna, dum nta na arung arai ni hpe la mat wa ai sha n-ga salang Da Bang Brang Awng asak 43 ning hte salang Da Bang La Wawm asak 29 ning yan hpe mara kata rim woi mat wa nhtawm, Manbat mare kaw TNLA ni a Hpyen hking jahpun nna, gyit adup zing ri san jep ai lam nga ai.
Rim hkrum ai salang yan hpe bai dat ya na matu Mare myit su ni hku nna, dai yan gaw mungmasha re, hpa mara nnga ai lam hpe Man Dung Byuha de shana ai lam galaw ai. Adup zing ri hkrum ai salang yan gaw, July 7 ya shana maga hkying 6:00pm aten daram hta dum nta de bai du wa sai lam, salang Da Bang Brang Awng gaw machyi sawng ai majaw, Lashio kaba de tsi lajang sa hkyen ai lam, dai buga salang langai tsun ai kawn chye lu ai.
Dai ni July 8 ya shani mung, Da Bang mare grup yin kahtawng hkan na myit su salang ni hpe Myen hpyen ni kawn zuphpawng woi galaw nga ai lam matut chye lu ai.
