Gasat gala majan byin nga ai hta gumshem Myen hpyen dap ni a matu wa jahkrat ya ai malu masha KIA ni zing la lu
KIA Masat (1) Dap Ba, Masat (1) Dap Dung ginra, Sumpra Bum Ginwang kata gasat gala majan byin nga ai hta gumshem Myen hpyen dap ni a matu, wa jahkrat ya ai malu masha arung arai ni hpe KIA ni zing la lu ai lam chye lu ai.
March shata 25 ya shani Sumpra Bum kaw dap jung nga ai, gumshem Myen hpyen dap ni a matu, Y12 nbungli hte wa jahkrat ya ai n-gu malu masha ni hpe KIA pawng hpawm hpyen hpung ni zing la lu ai lam na chye lu ai.
Lai wa sai March shata 20 ya shani hta mung, gumshem Myen hpyen dap ni nbungli hte laknak arung arai wa jahkrat ya ai hpe KIA pawng hpawm hpyen hpung ni zing la lu ai lam nga sai re.
Sumpra Bun ginra hta lai wa sai praw 9 ya shani kaw na dai ginra hta dap jung nga ai gumshem Myen hpyen dap ni hpe KIA pawng hpawm hpyen hpung ni htim gasat nga ai gaw ya aten du hkra, gasat gala majan naw laja nga ai lam chye lu ai.
Gasat gala majan laja lana byin nga ai hta gumshem Myen hpyen dap shara nkau hpe KIA ni zing madu la lu sai rai nna, ngam nga ai hpyen dap nkau hpe matut naw htim gasat nga ai hta gumshem Myen hpyen dap nbungli, laknak kaba ni hte ding yang gap garum ya nga ai lam matut chye lu ai.
