Gasat gala majan byin wa na hpe hkrit tsang ai majaw, Mya Lay mare na mungshawa nkau mi Manje hpyen yen camp de koi yen

Gasat gala majan byin wa na hpe hkrit tsang ai majaw, Mya Lay mare na mungshawa nkau mi, August shata praw 2 hte 3 ya shani Manje de koi yen du nga ai lam, Manje mare na salang langai tsun ai kaw na chye lu ai.

Mya Lay mare na koi yen wa ai mungshawa ni hpe, Manje KBC hpyen yen camp kaw nga shara lajang ya ai, malu masha hpe gaw naw shadu jaw nga ai. Ya koi yen wa ai nta htinggaw 26 rai nna, asak kaba sai dinggai dingla ni hte Ma kaji ni re, nkau waja wa-ngan ni gaw mare kaw naw nga ai lam, salang wa tsun ai.

Ndai mare hta gasat poi byin ai lam gaw nnga ai raitim, gumshem Myen hpyen dap ni gaw, Seinhkan mare maga de htu shadut lung ai majaw, gasat gala majan byin wa na hpe hkrit tsang nna, koi yen wa ai re lam chye lu ai.

KIA Masat (1) Dap Nawng Daju, Masat (253) Dap Nawng Dap Dung ginra hta mung, August shata praw 3 ya jahpawt hkying 7:30am aten kaw nna, Ja Pu lai Mali Yang mayan kaw gumshem Myen hpyen dap hte KIA hpyen hpung ni laja lana gasat gala majan byin ai lam chye lu ai.

Dai gasat gala majan hta Mali Yang mare makau na gumshem Myen hpyen dap langai hpe KIA hpyen hpung ni sa gasat zing la lu ai lam, shawng lam shiga lawk kaw na chye lu ai.