Gasat majan a majaw Mungshawa ni hpyen koi yen hprawng hkawm nga

N-gum La mare hte Kawng Ra mare ni kaw April, 25 ya shani Myen Jet Nbungli hte wa gap bun, lagaw hku nna hpyen n-gun kaba htu shadut lung wa ai majaw gasat majan byin wa ai. Pungse Zup, Sutngai Yang, Pungswi Yang, Zupmai Yang, Bumnen Yang, Jawsa, Hkumtsai Yang, Hpatsip Zup, Sani Tu Yang hte Tangbau Yang hkan na Mungshawa ni yawng marai ( 1101 ) gaw April, 26 ya shani Gwi Htau Hkali daru de hprawng pru wa ai hpe Myitkyina pawng hpawm Nawku hpung ni rai nga ai MCC, PCG, Rescue hpung ni woi awn nna buga hpung shagu na Modo ni hte Gwi Htau daru kaw sa tau la nna Tanghpare Catholic Hpung Nawku Jawng kaw hpawng de nga ai lam na chye lu ai.

April, 27 ya shani gaw MCC ni woi awn nna Hkalup Hpung masha ni gaw Trinity buga de htawt wa na re lam hte Karum ningtum ai lam hpe gaw Myitkyina Zai Ladat Hkridun Hpung  ( JST ) ni kawn lit la mat wa na re lam hpe mung chye lu ai.