Gatet zunlawng hta Ja htu sha ai Company ni hpe jahkring ya na matu mare masha ni ninghkap laika bang
Waimaw Labang kahtawng makau na Gatet Zunlawng kaw zaibru shaw let Ja htu sha nga ai company ni hpe jahkring ya na matu, Myitkyina hte Waimaw ginwang, mare kahtawng 6 na mungshawa ni ta masat htu nna February shata 20 ya shani Jinghpaw Mungdaw Hkinngmang Daju Dr. Hkyet Awng ( ၀န္ျကီးခ်ဳပ္ ) kaw laika bang tang madun da ai lam na chye lu ai.
“Ndai zunlawng gaw buga masha ni a matu grai ahkyak ai shara re sha n ga laisai ten kaw na daini du hkra galaw lu galaw sha nga ai shara re. Ndai zunlawng nga ai majaw sha, buga mare ni hta Ngahkwi ai, hkai lu hkai sha kanbau bungli a matu mung akyu rawng ai shara re” nga nna Lamyang buga na mare Salang Maran Tang Hkam tsun ai.
Zaibru shaw let Ja htu sha nga ai Company ni gaw Shwe Sun Thait Company, Ko Aung Win hte Ko Aung Naing yan nau madu ai Company ni rai nna Backhoe 8 hte galaw nga ai lam chye lu ai.
“Anhte ndai shara hpe gaw ndai zawn re zaibru shaw ai nga nna ja htu sha ai lam ni n galaw shangun mayu ai. Ndai shara hpe anhte buga masha ni a matu grin ai shara langai byin tai shangun mayu ai. Matut nna ndai zunlawng hta galaw wa na kadai hpe mung anhte gaw ahkang njaw shangun mayu ai. Anhte buga masha ni hpe garum ai hku nna seng ang ai Asuya ni mung ninghkap ya na hpe ra sharawng ai” nga nna Salang wa matut tsun ai.
Ndai magam bungli hpe 2018 ning shata man 1,2 kaw na galaw hpang sai rai nna 2019 ning hta grau nna galaw wa nga ai majaw, Lamyang mare, Nawngnang mare, Gawnan mare, Rosana mare, Mawtawng mare hte Labang mare na mungshawa marai 662 tup ta masat htu ninghkap ai hpe chye lu ai.
