Gaw Ningja hte seng nna ningmu jahpaw hkaw tsun hpawng galaw
Kachin Development Group (KDG) kaw nna woi awn nhtawm, Laiza lawk (4) kaw nga ai Gaw Ningja dum nta masha ni hte lawk kata na kanu kawa ni hpe September shata 23 ya shani Lawk Komiti Rung Gawknu kaw Gaw Ningja hte seng nna ningmu jahpaw hkaw tsun hpawng galaw ai lam chye lu ai.
Hkaw tsun hpawng hta KDG kaw na Volunteer Saranum Nhkum Sam Tawng kawn ra rawng gawng kya ai ni gaw kaning re ni re, Gaw Ningja ngu ai gaw kaning re ni re, ra rawng gawng kya ai hte Gaw Ningja gaw nbung ai lam ningmu jahpaw tsun sanglang dan ai lam galaw ai re hpe chye lu ai.
Shinggyim wuhpung wuhpawng kata hta Gaw Ningja ni hpe n kabai da ai sha, kaning re masha ni hpe gara hku lakawn la chye ra ai lam, Gaw Ningja ni nan atsam shapraw nna tinang lagaw tinang lu tsap wa hkra ngu yaw shada let ningmu jahpaw lamang galaw ai lam, Volunteer Saranum Nhkum Sam Tawng tsun ai.
“Wuhpung wuhpawng makau grup yin hta Gaw Ningja ni hpe asawng asang yu kaji ai lam ni a majaw, myit kaja garen ai lam ni nga ai re, shanhte hpe n kabai da ai ngu hpe chye na shangun mayu ai lam, mare buga tinang dum nta kata na Gaw Ningja ni hpe ganing re hpe anhte lakawn la ra ai, kaning re hpe gaw n kabai da ra ai ngu hpe grau yaw shada ai re” nga nna tsun dan ai.
KDG kawn Gaw Ningja hte seng nna ningmu jahpaw ai lam hpe September shata 22 ya shani hta mung Hpun Lum Yang Hpyen Yen Dabang kaw galaw ai re lam chye lu ai.
