Gawng shakyang ginsup ai jawngma ni hpe majat jaw hpawng galaw
Laiza Muklum hpaji jawngma ni a hkum gawng shakyang ginsup lamang hta, hpaji jaw mungga hte lakjet jaw ai lam hpe January shata 15 ya shani 10:00am aten hta, Laiza Lahta Tsang Jawng, Rawt Ninghkawng Gawknu kaw galaw ai re.
Majat jaw hpawng hta, Sara Kaba Dumsa Lawt Awng (Htunghking hte Laili Laika Magam Dap matsing ningting hpu-awn) kaw nna jawngma ni hpe mau mwi, ga shadawn ni hte lakjet jaw ya ai lam chye lu ai.
Laiza Muklum Uphkang Du Salang Kaba Wala Gum Ja Du kaw nna mung, jawngma ni hpe hpaji jaw mungga shaga ai hta, “gawng shakyang ginsup ai gaw hkumhkrang hkamja lam langai a matu sha nre, myit masin a hkamja lam, wuhpung wuhpawng hte chye shamu shamawt ai lam ni, amyu sha lam yan hte seng ai gawng shakyang ai shingni lawm ai hpe shaw la nna chye ginsup ra ai. Myitsu myit kawp ai madat mara ai, hkamja zet let ai hte galu ai kaba rawt malan ai jawngma, ramma ni byin tai wa lu na matu yaw shada ai re” nga nna tsun ai.
Hpawng lamang hta, Laiza Lahta Tsang Jawng, Laiza Lapran Tsang Jawng hte Sama Ginwang Sasana Lahta Tsang Jawng kaw na tsang 7 a lahta gawng shakyang ginsup ai jawngma ni marai 200 jan sa du madat hkam la ai re lam chye lu ai.
