Ginjaw COVID-19 Ana Zinli Makawp Ninghkap Komiti kaw nna COVID-19 ana zinli hte seng ai ndau laika shapraw
Ginjaw COVID-19 Ana Zinli Makawp Ninghkap Komiti kaw nna November shata 13 ya shani hta, COVID-19 ana hte seng nna mungchying mungshawa ni hpang de ndau laika shapraw da ai re.
Ndau laika hta ya aten Myen Mungdan kata COVID-19 ana kap bra nga ai madang gaw tsaw ding yang naw rai nga ai hpe mu lu ai. Anhte ginra makau Loi Je hte htingbu Miwa Gumsan Mungdan, Dehong ginra hta mung ndai laman COVID-19 ana kap ai masha bai mu jep ai hpe mu lu ga ai.
Jinghpaw Mungdaw kata COVID-19 ana kap bra ai masha hta hkan nna, tinang Uphkang ginra kata de pru/shang hkawm sa ai lam, kun rai htaw shalet la ai lam ni hpe pat hkum da ai aten grai na wa sai re majaw, mungshawa, dap shawa ni myit ru myit pu yak hkak ai lam ni grai nga na re ngu myit dum ga ai.
Yak hkak dut dang jam jau ai lam ni hpe hkam sharang nna hkam jan lu hkra jawm shakut shaja sa wa ra na ga ai. Ndai zawn jawm shakut shaja nga ai lam gaw COVID-19 ana zinli hpe padang dip la lu na matu rai nga ai.
COVID-19 ana kap bra ai aten ladaw galu wa ai hte maren, COVID-19 ana zinli makawp ninghkap komiti kaw nna, mungshawa ni hpe garum shingtau lu hkra ladat shaw masing gran nga ga ai. Tinang Uphkang ginra kata malu masha ra kadawn wa ai lam nnga hkra mung galaw shajin da ai hte gat rai manu ni grai tsaw rawt wa ai lam nnga hkra mung dingyang yu maram nga ga ai.
Myen Mungdan kata COVID-19 ana chyam bra ai lam n yawm mat ai re majaw, mungchying mungshawa hte dap shawa ni yawng grai naw sadi maja let, COVID-19 ana zinli makawp ninghkap komiti kaw nna jahkrat da ai tarawng tara ni hpe matut hkan nang hkan sa nga ga ngu lajin dat ai.
COVID-19 ana zinli makawp ninghkap komiti gaw pat hkum da ai tinang Uphkang ginra kata masha pru/shang ai lam, kun rai htaw shalet la ai lam ni hte seng nna ding yang yu maram dinglik nga ga ai. Dai re majaw COVID-19 ana zinli kap bra ai masa sat lawat hta hkan nna, htuk manu wa ai ten hta pat hkum da ai ni hpe bai hpaw sa wa na re lam, Ginjaw COVID-19 Ana Zinli Makawp Ninghkap Komiti kaw nna tang madun ndau shabra da ai re.
Credit; COVID-19 Ana Zinli Makawp Ninghkap Komiti
