Ginjaw Ginra de Myen hpyen dap nbungli bawm wa jahkrat bun
Laiza Ginjaw Ginra makau grup yin de gumshem Myen hpyen dap ni nbungli hte bawm wa jahkrat bun ai lam chye lu ai.
May shata 21 ya shana hkying 10:55pm aten hte 11:15pm aten daram hta Laiza Ginjaw Ginra makau grup yin de, gumshem Myen hpyen dap ni numdaw 3 lang nbungli hte bawm wa jahkrat bun ai re lam, Laiza ginra masha ni tsun ai.
Nbungli bawm wa jahkrat bun ai hta mungshawa ni hkala hkrum ai lam nnga ai hte Waimaw ginra hta mung, gumshem Myen hpye dap ni nbungli bawm, laknak kaba hte gap bun ai lam ni nga ai hpe chye lu ai.
May shata 21 ya shana hkying 8:30pm aten daram hta Waimaw hte Laiza lam kaba ntsa dap jung nga ai, Shwe Nyawng Pin gumshem Myen hpyen Hk.M.Y (321) dap hpe KIA pawng hpawm hpyen hpung ni zing madu la ngut ai hpang, shana yup tung maga gumshem Myen hpyen dap ni Ginjaw Ginra de nbungli hte a kajawng sha wa gap bun ai re hpe chye lu ai.
