Ginjaw ginra hte Masat (44) Dap Dung ginra kaw gasat gala majan byin
KIO ginjaw ginra, Madi Yang hpyen man maga de August shata 27 ya jahpawt hkying 9:00am aten daram kaw nna, gumshem Myen hpyen hte KIA ni gasat gala majan laja lana matut byin ai lam chye lu ai.
Gasat poi byin ai hta Myen hpyen maga si hkala law ai majaw, Myitkyi na maga de na Jet Fighter nbungli 3 hte numdaw masum lang bawm wa jahkrat bun ai lam nga ai.
Hka Ya Bum hte Bumre kaw nga ai gumshem Myen hpyen ni mung, Madi Yang hpyen man de laknak kaba gap bun ai majaw, KIA ni laknak kaba hte bai nhtang gap bun ai sha n-ga Drone hte bawm wa jahkrat bun ai hpe chye lu ai.
KIA Masat (9) Dap Ba, Masat (44) Dap Dung ginra, Hpakant lam Gat Noi mare makau kaw shamu shamawt pru wa ai gumshem Myen hpyen hpung ni hpe KIA ni, August shata 27 ya jahpawt hkying 9:00am kaw nna, shani ka-ang hkying 12:00non aten du hkra, numdaw 3 lang gasat poi byin ai lam chye lu ai.
August shata 24 ya shana hta mung, Kamaing kaw nna, Nam Ya kaw du nga ai gumshem Myen hpyen dap ni gaw, shanhte a ninggang shatai na matu, Nam Ya mare kaw shingbyi nga ai mungshawa marai (30) daram hpe rim woi mat ai hta dai ni du hkra dat ya ai lam nnga shi ai hpe ginra masha ni tsun ai kaw na chye lu ai.
Ya aten hta gumshem Myen hpyen hte KIA ni hpyen masa shaja hkat nga dingyang re majaw, gasat gala majan matut byin wa mai ai lam, shawng lam na lit nga ai salang ni tsun ai kaw na chye lu ai.
၎
င
၎
၎
