Ginjaw Ginra KIA Masat (5) Dap Ba ginra de, gumshem Myen hpyen ni htu shadut lung wa ai majaw gasat gala majan byin
Ginjaw Ginra KIA Masat (5) Dap Ba, Masat (19) Dap Nawng Dap Dung ginra de gumshem Myen hpyen ni htu shadut lung wa ai majaw, KIA hpyen hpung ni gasat gala majan byin ai lam chye lu ai.
Dai ni June shata praw 7 ya jahpawt daw hta KIA Masat (5) Dap Ba, Masat (19) Dap Nawng Dap Dung ginra, Numlang mare makau Loi Jaw Kadawng mayan kaw gasat poi byin ai re.
Gasat gala majan byin nga ai shara de, gumshem Myen hpyen dap ni laknak kaba hte gap bun ai lam nga ai.
June shata praw 3 ya shani hta mung, KIA Masat (19) Dap Nawng Dap Dung hpyen hpung ni hte gumshem Myen hpyen hpung ni Daw Hpum Yang hte Uhtang Yang lapran kaw gasat poi byin ai re.
Min Aung Hlaing woi awn ai gumshem Myen Hpyen Dap kawn laknak lang rawt malan wuhpung ni hte simsa lam bawngba na matu, May shata 30 ya shani kaw nna, June shata 30 ya shani du hkra, shata mi dinghkrai gap hkat jahkring ai lam ndau da ai raitim, KIA ni nga ai shara de hpyen n gun shamu shamawt lam ding yang galaw nga ai majaw gasat poi shani shagu ngu na naw byin nga ai hpe chye lu ai.
