Ginjaw Ginra makau grup yin gasat gala majan laja lana matut byin
KIO, KIA Ginjaw Ginra makau grup yin hte Waimaw, Laiza lam kaba ntsa, KIA hte gumshem Myen hpyen dap lapran gasat gala majan laja lana matut byin nga ai re.
March shata praw 7 ya shani kaw na Ginjaw Ginra makau grup yin hte Waimaw, Laiza lam kaba ntsa hta dap jung shara jahkrat nga ai, gumshem Myen hpyen dap shara ni hpe KIA pawng hpawm hpyen hpung kawn htim gasat nga ai hpe chye lu ai.
KIA pawng hpawm hpyen hpung ni htim gasat nga ai hta Mali Hka, Awng Me Tit Shwe Min P.T.Ts, Hkang Gai bum laknak kaba dap Hk.L.Y (142) hte gumshem Myen hpyen dap post nkau hpe KIA ni padang dip la lu sai rai nna, ngam nga ai gumshem Myen hpyen dap shara ni hpe matut htim gasat nga ai lam chye lu ai.
Gasat gala majan laja lana byin nga ai hta gumshem Myen hpyen dap ni nbungli bawm, laknak kaba ni hte hkrup mara gap bun ai majaw, mungshawa ni a dum nta nkau hten za hkrum ai hte KIA hte gumshem Myen hpyen dap lapran hpyen masa shaja hkat nga ding yang re hpe chye lu ai.
