Ginjaw Ginra makau kaw KIA hte Myen Hpyen Dap ni gasat gala majan matut byin
Ginjaw Ginra makau, KIA Masat (5) Dap Ba ginra, Byin Pu Kawng kaw nna pru wa ai Myen hpyen n-gun (50) daram hpe KIA Dung (3) hpyen hpung ni April shata 22 ya jahpawt hkying 9:00am-9:30am aten laman Ding Ga hte Wu Htau Bum lapran kaw hkap gasat dat ai kawn gasat gala majan byin ai lam chye lu ai.
Shana maga hkying 3:20pm aten daram hta mung, Daw Hpum Yang kaw nna pru wa ai Myen hpyen n-gun (30) daram hpe KIA Dung (19) hpyen hpung ni Ta Li hka kau kaw bawm hte hkap shingla gasat ai lam chye lu ai.
Lai wa sai April shata 20 ya shana maga hkying 3:40pm aten hta mung, Mungmyit Sinli Ga (Kachin Sub-state) KIA Masat (36) Dap Dung ginra, Nam Gut maga kaw nna pru wa ai Dapnu (99) kata na Myen hpyen n-gun 80 daram hte MNDAA hpyen hpung ni Ya Pa kaw ang katut gasat poi byin ai lam na chye lu ai.
Jinghpaw Mung hte Mungmyit Sinli Ga (Kachin Sub-state) ginra ni hta, KIA hte Myen Hpyen Dap ni lai wa sai February shata 11 ya shani kaw nna ya aten du hkra shani shagu ngu na daram gasat gala majan byin nga ai rai nna, lahkawng maga hpyen shamu shamawt ai masa hta hkan nna gasat gala majan matut naw byin wa mai ai re.
