Ginjaw Hpaji Dap kawn woi awn ai SIP wunkat hpawng galaw

Wunpawng Mungdan Shanglawt Asuya Ginjaw Hpaji Dap kaw nna, woi awn galaw ai Student Improvement Plan (SIP), wunkat hpawng hpe August shata 12 ya shani kawn 14, masum ya shani du hkra, Laiza Hotel zuphpawng gawk kaw galaw ai lam chye lu ai.

Ndai wunkat hpawng hte seng nna, Ginjaw Hpaji Dap Ningtau Amu Madu Sara Kaba Lahtaw Zau Hkyen kaw nna hpawng a yaw shada lam hpe ya na zawn tsun ai.

“Ndai wun kat gaw anhte a matu bungli nnan gaw nre raitim, anhte galaw nga ai magam bungli hpe ladat masing hkrak hkrak hte lu galaw sa wa na matu, jawng komiti, kanu kawa, mungshawa, jawng sara saranum ni hte jawng ma ni yawng hkra jawm shang lawm nna, jawng rawt jat galu kaba wa na matu yaw shaga let galaw sa wa ai re”

SIP wunkat hpawng hta sharin achyin hte chye chyang madang maram masam ai lam, woi awn uphkang ai hte hparan hpareng ai lam, jawng a Ja gumhpraw hparan hpareng ai lam, sara saranum ni hte magam gun ni a chye chyang kungkyang atsam ningja rawt jat lam, jawng dum nta hte jawng hkinghku ni hpe hparan hpareng ai lam, jawngma kanu kawa ni a shanglawm lam hte myusha laili laika hte htunghking manu shadan lam ga baw ni hpe jawm bawngban ai lam galaw ai re.

Wunkat hpawng hta Ginwang Ginjaw 7 kata na Hpaji Du ni hpe shaw shaga let galaw ai rai nna, lai wa sai shaning ni hta mung galaw sai lam chye lu ai.