Ginjaw Komiti Tingnyang Up Malai, Dap Awn Daju a shatsam mungga hkamla hpawng galaw
KIO Ginjaw Komiti Tingnyang Up Malai, KIA Dap Awn Daju, Du Daju Jum Gunhtang Gam Shawng a shatsam mungga hkamla hpawng hpe October shata 17 ya jahpawt hkying 9:00am aten kawn hkying 11:05am aten du hkra, Laiza Muklum Padang Rung Gawknu kaw galaw ai lam chye lu ai.
Laiza buga hkalup hpung a hpung up Rev. Lahpai Shing Rip kawn hpawng hpaw akyu hpyi ya ai. Du Daju Jum, Gunhtang Gam Shawng kaw nna “Makam hte amyusha lawt lam” ngu ai ga baw hpe la kap nhtawm, mungchying kanu kawa ramma ni hpe n gun jaw shatsam mungga tsun ai.
“Anhte Wunpawng amyusha ni gaw Karai Kasang hpe chye ai sha nre, manoi manat kam ai ni re. Majan ndai hta Karai Kasang gaw anhte hpe san poi san na re ndai san poi hta anhte awng ra ai, awng yang she anhte mung lawt lu na re. Anhte amyu ni tsawm ai amyu, Chyoi pra ai amyu ni tai ra ai, anhte a Karai Kasang gaw Chyoi pra ai wa re majaw shi a kashu kasha ni mung Chyoi pra ra ai. Karai ra tsaw ai Wunpawng amyu hkum ding dek tai hkra, Karai tsaw ai Magam Dap, Karai tsaw ai magam gun, Karai ra tsaw ai buga byin na hpe myit mada ai, anhte a ra rawng ai lam hpe tsi kau nna shawng lam de myit hkrum ai laknak, n gang lang nna sa wa ga” nga nna tsun ai.
Nawng E Hku Sasana Lahta Tsang Jawng tsang 9 kaw hpaji sharin hkamla nga ai Ramma Hpaujung Naw Hkam gaw, Du Kaba tsun mat wa ai hta shi mu mada hkamla ai lam hpe ya na zawn tsun ai.
“Du Kaba gaw makam masham hta grai ngangkang ai wa re ngu mu la ai. Bai nna ramma ni hpe mung makam masham lam hta grai n gun jaw ai, ndai gaw yawng na matu hkrak ai, ramma ni makam masham lam hpe grau madung dat nna hkawm sa ra sai ngu chye na la ai” nga nna tsun ai.
Du Daju Jum, Gunhtang Gam Shawng (KIO Ginjaw Komiti Tingnyang Up Malai, KIA Dap Awn Daju) a mungga hkamla hpawng hta Laiza Muklum kata na nawku hpung woi sara, kanu kawa ramma ni, Lazai lahta tsang jawng, sara/num jawngma ni, Hpa-awn shalat jawngma ni, Nawng E Hku Sasana jawng sara/num jawngma ni, Woi Chyai hpyen yen kanu kawa ni, Munglai Hkyet maga na kanu kawa ni, Mung Seng Yang, Ja Htu kawng na kanu kawa ni hte Magam Dap na myitsu Salang ni yawng marai 1031 tup, sa du madat hkamla ai lam chye lu ai.
