Ginra mahta Karai Masa bawngban hpawng galaw na
Jinghpaw Wunpawng Chyum Dakkasu, Research and Documentation kawn woi awn nna, ginra mahta Karai Masa bawngban hpawng hpe January shata praw 9 ya shana maga hkying 1:00pm kaw nna hkying 2:40pm aten hta Jinghpawng Wunpawng Chyum Dakkasu Nawng Nang kaw galaw na re lam chye lu ai.
Bawngban hpawng galaw ai a yaw shada ai lam hpe Saranum Dr. Layang Seng Ja ya na zawn tsun ai.
“Dai ni ndai ban hta hkrung nga ai Jinghpaw Wunpawng Amyusha ni gaw rawt malan hkrun lam naw rai nga ai majaw, rawt malan hkrun lam hkawm ai shaloi, grau nna hpung woi langai a tsap shara ngu ai hta Hpung urawng shagu hta Chyum laika hte woi awn ai magam gun langai hpung masha langai gaw, Yesu Hkristu a katsi rai nga ai tara rap ra lam, lawt lu ai masha, lawt lu ai amyu byin hkra woi gawgap chye ra ai. Hkristan tai ai hpung woi langai tai ai ngu ai gaw akyu sha woi hpyi, si mang sha woi makoi ai hku nre sha, shinggyim wuhpawng hta byin nga ai ana zinli hpe chye yu ra ai sha n-ga, dai hpe Karai a mungga, Karai a katsi hte nan tatut shang lawm woi awn hparan chye ai hpung woi, hpung magam gun ni byin tai wa lu na matu yaw shada ai re” nga nna tsun ai.
Bawngban hpawng hta Myanmar Institute of Theology (MIT), Yangon Insein kaw na Jawng Up, Rev. Dr. Samuel Ngun Ling kaw nna dai ni Karai Masa ngu ai law law nga ai hta rawt malan hkrun lam naw hkawm nga ai Myen Mungdan hta gaw kaning re Karai Masa hpe jai lang nna hkawm sa chye ra ai ngu ai ga baw hte woi bawngban na rai nna, Sara Kaba, Rev. Dr. Hkalam Samson kaw nna mung Hpung woi langai mi buga hpung, shinggyim wuhpung wuhpawng de du mat wa ai shaloi, hpung woi langai a tsap shara gaw gara hku rai ra ai, kaning re ai lam ni hpe tatut woi awn galaw chye ra ai ngu ai lam ni hte woi bawngban na re hpe chye lu ai.
Ginra mahta Karai Masa bawngban hpawng hta madung gaw KTCS kaw na jawng yu hkyen sai jahtum shaning pang na jawngma ni shang lawm madat hkamla na rai nna, kaga buga kaw na shang lawm mayu ai ni gaw mying jahpan jaw nna shanglawm madat hkam la mai ai lam chye lu ai.
Bawngban hpawng hpe laning mi hta 2 lang galaw ai rai nhtawm, matut nna shaning shagu ga law sa wa na masing nga ai re hpe chye lu ai.
Photo; KTCS Nawng Nang
