Ginwang Up Jau hte Ningtau Ginwang Up Jau yan hpe hkaptau hkalum ai lamang galaw
Laiza Jau Ginwang Up Jau nta wang hta Ginwang Up Wa Jau Peter Lazum Tu Lum hte Ningtau Ginwang Up Wa Jau Mahte Mwi Hpu Naw Grawng yan hpe hkaptau hkalum ai lamang hpe June shata praw 4 ya shana hkying 5:00pm aten hta hkalum hpawng galaw la lu sai lam chye lu ai.
Wa Jau Joseph Nbwi Naw kaw nna Wa Jau Peter Lazum Tu Lum hte Wa Jau Mahte Mwi Hpu Naw Grawng yan hpe shachyen ya ai hte hkalum mungga shaga ai. Du Kaba James Nhpang Naw Bu kaw nna mung, chyeju dum mungga shaga ai hte kumhpa, nhpye, n-ga, Sanggan, ni hpe shagrau ya ai.
Du Kaba Petru Pauhkyi Zau Hpan kaw nna Jau Ginwang nawku hpung a gawng malai hkalum mungga shaga nhtawm, magun shat lit 3 hpe Wa Jau marai 3 hpe ap ya ai. Dai hpang Jau ginwang tarahkaw sara komiti magun shat lit, Jau ginwang ramma komiti magun shat lit, Pajau Bum, Maisak Pa, Woi Chyai IDP, Ja Htu Kawng, Je Yang IDP, Hpun Lum Yang IDP nawku hpung masha ni a magun shat lit hte Dai Lawn Rung Hkristan Ginlung Komiti a magun shat lit yawng 13 hpe Wa Jau ni hpe shagrau ai lam galaw ai.
Laiza Jau Ginwang hpe lai wa sai 2017 ning May shata 17 ya shani Jau Ginwang ajet hku nna masat la lu sai lam, Mungbawng Amu Madu Salang Peter Run Zau Mai tsun dan ai.
Wa Jau yan hpe hkaptau hkalum lamang hta saw shaga da ai magam dap shagu na Salang ni, hkalup nawku hpung na sara ni, Ginjaw Salang ni hte buga hpung masha ni yawng marai 300 daram shang lawm ai lam chye lu ai.
