Gumshem Myen Balik Dap ni ramma la kasha ni hpe madung tawn laja lana sawk jep lam galaw nga

Ya aten hta Myitkyina, Kawa Hka gumshem Myen balik dap shagyit (Gate) kaw lai wa lai sa hkrumlam hkawm masha ni hta ramma La kasha ni hpe madung tawn sawk jep nga ai lam, buga masha ni tsun ai kaw na chye lu ai.

Hkawm sa hkawm wa aten hpe jahpawt hkying 6:00am aten kaw nna shana daw hkying 6:00pm aten du hkra sha, ahkang jaw da ai nhtawm Myitkyina de shang wa ai ni hpe grau nna sawk jep ai lam, ginra masha ni tsun ai kaw na chye lu ai.

July shata 13 ya jahpawt daw hta mung, Myitkyina Nam Jim mare mahkrai kaw gumshem Myen hpyen la ni, lai wa lai sa mungshawa ni hpe hkap jahkring sawk jep nhtawm, sumla gayet la ai lam ni galaw nga ai lam chye lu ai.

Ndai zawn lai wa lai sa mungmasha ni hpe laja lana sawk jep wa ai gaw, lai wa sai June shata kaw nna sawk jep ai lam ni galaw nga ai hpe chye lu ai.

Photo; Online