Gumshem Myen hpyen balik dap hpe KIA ni sa htim gap gasat

KIA Masat (9) Dap Ba, Masat (26) Dap Dung ginra, Sezin mare kaw dap jung shara jahkrat nga ai, gumshem Myen hpyen balik dap hpe August shata praw 9 ya shana daw hkying 1:00pm aten hta KIA hte KPDF pawng hpawm hpyen hpung ni sa htim gap gasat ai lam chye lu ai.

Gasat poi byin ai shara de gumshem Myen hpyen ni Jet Fighter nbungli hte numdaw 3 lang bawm wa jahkrat gap gasat ai hta Sezin mare ka-ang kaw bawm langai wa hkrat kapaw ai majaw, mungmare masha ni hkra hkala hkrum ai lam na chye lu ai.

Mani August shata praw 8 ya shani hta mung, Sezin mare kaw dap jung shara jahkrat nga ai, gumshem Myen hpyen dap Hk.M.Y (119) dap hte Sam Hkyeng SNA Pyi Tu Tsit dap hpe KIA, KPDF pawng hpawm hpyen hpung ni sa htim gap gasat zing kau lu ai lam chye lu ai.