Gumshem Myen hpyen dap a, Helicopter nbungli (2) hpe KIA pawng hpawm ni gap jahten kau lu
Manmaw hpyen man Ts.K.Hk (21) maga de sa wa ai gumshem Myen hpyen dap a, Helicopter 3 kaw na 2 hpe, May shata 20 ya shana daw hkying 1:00pm aten daram hta KIA pawng hpawm hpyen hpung ni gap hkra dat ai lam, shawng lam na lit nga ai salang ni kaw na chye lu ai.
Gap hkra ai nbungli gaw, Mi- 17 hte Mi- 35 Helicopter rai nna, langai gaw, Shwegu kaw hkyak hkyak wa yu mat nhtawm, langai gaw Shwegu ndu shi yang nam maling kaw hkrat hkru mat ai lam na chye lu ai.
Bai langai gaw gap hkra ai lam nnga ai sha Myitkyina Nampawng nbungli pa kaw wa yu du sai lam, ginra shiga lawk kaw na chye lu ai.
Manmaw hpyen man maga de, gumshem Myen hpyen ni gaw shani shagu ngu na Drone hte nbungli bawm ni jahkrat gasat nga ding yang re majaw, mungshawa ni hkra hkala si sum ai sha n-ga, dum nta ni mung law law hten za mat sai re.
Ya aten gumshem Myen hpyen hte Pyi Tu Tsit pawng hpawm hpyen hpung ni gaw, KIA Masat (1) Dap Ba ginra, Masat (5) Dap Ba ginra hte Hpakant Masat (9) Dap Ba ginra ni de hpyen n-gun law law hte htu shadut lung wa ai majaw, gasat gala majan byin nga ai lam, shawng lam shiga lawk kaw na chye lu ai.
