Gumshem Myen hpyen dap a, Jet Fighter nbungli langai hpe KIA ni gap jahkrat
Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung ginra, Namhpakka manau yang mayan kaw, January shata 16 ya shani ka-ang hkying 12:00noon aten daram hta KIA ni gumshem Myen hpyen dap a, Jet Fighter nbungli (1) hpe gap jahkrat kau ya ai lam na chye lu ai.
“Dai ni hkying shi lahkang grup yin e rai nga ai, Namhpakka kaw line nmai lang ai majaw, line mai lang ai shara kaw du ai hte nbungli hkrat kapaw ai nsen gaw na dat ai. Manau Yang kaw wa hkrat kapaw ai nga shana wa ma ai” nga nna shawng lam na lit nga ai salang langai tsun ai.
Namhpakka kaw dap jung shara jahkrat nga ai, gumshem Myen hpyen dap Hk.L.Y (123) dap hpe lai wa sai 2023 ning December shata 29 ya shani kaw nna, KIA Masat (4), Masat (6) hte Masat (10) Dap Ba pawng hpawm hpyen hpung ni wa htim gasat nga ai hpyen dap re.
Gasat gala majan gaw hkring dat gap dat naw rai nga ai, gumshem Myen hpyen dap ni gaw, Y-12 nbungli hte Jet Fighter kaw nna bawm jahkrat gasat nga ding yang re. Hpyen dap makau grup yin shara ni hta bawm nau hkam da ai majaw zep zi zing kau lu ai lam gaw nnga shi ai, nga nna salang wa matut tsun ai.
Ndai January shata praw 3 ya shani hta sha, Ginjaw Ginra, Ginwang Ginjaw, Na Hpaw gumshem Myen hpyen dap kaw hpyen lang arung arai hte malu masha wa htaw sa nna, bai nhtang yu ai Helicopter nbungli lahkawng kaw na langai hpe KIA ni hkap gap jahkrat kau ya ai hpe mung chye lu ai.
