Gumshem Myen hpyen dap a malu masha htaw Modo hpe Kokang MNDAA ni hkap gap kapaw kau ya
Mungmyit Sinli Ga (Kachi Sub-state) ginra hta hpyen shamu shamawt hkawm nga ai Gumshem Myen hpyen dap a malu masha htaw Modo langai hpe Namtau, Lung Hkang mare makau kaw September shata 10 ya shani hkying 1:48pm aten hta Kokang MNDAA ni hkap gap kapaw kau ya ai lam chye lu ai.
“Gumshem Myen hpyen dap ni gaw, Lung Hkang mare kaw na malu masha htaw lung wa ai aten, Lung Hkang mare makau Modo lam kaw Kokang MNDAA ni hkap gap jahten kau ya ai” nga nna dai ginra na salang langai tsun ai.
September shata 8 ya shani hta mung, hkying 10:30am aten KIA Masat (2) Dap Ba, Masat (45) Dap Dung ginra, Shin Lung mare kawn pru wa ai Danai (D.K.Ts) kata na Myen hpyen n-gun (80) daram hpung ni hpe Brang Bram hka makau kaw KIA hpyen hpung ni Bawm hte hkap gap gasat ai hta, Myen hpyenla marai (3) si ai lam na chye lu ai.
Ya aten Jinghpaw Mung hte Mungmyit Sinli Ga (Kachin Sub-state) ginra ni hta Wunpawng Mungdan Shanglawt Hpyen Dap (KIA), Kokang MNDAA ni hte Gumshem Myen hpyen dap ni gasat poi matut byin nga ai re.
