Gumshem Myen hpyen dap a nbungli bawm, laknak kaba ni a majaw mungshawa ni a dum nta wan hkru htenza
Nmawk hte Manje Muklum kata gumshem Myen hpyen dap ni nbungli bawm, laknak kaba ni hte hkrup mara gap shadam bun nga ai majaw, mungshawa ni a dum nta ni wan hkru htenza nga ai lam chye lu ai.
May shata 16 ya shana kaw na kalang mi bai, Manje gumshem Myen hpyen Hk.M.Y (319, 601) dap ni laknak kaba hkrup mara gap shadam bun nga ai lam, Manje ginra masha langai tsun ai.
Lai wa sai May shata praw 7 ya shani kaw na Manmaw, Nmawk hte Manje ginra ni hta dap jung nga ai, gumshem Myen hpyen dap shara ni hpe KIA pawng hpawm hpyen hpung ni htim gasat hpang wa ai hta gumshem Myen hpyen dap ni kaw nna, nbungli bawm, laknak kaba ni hte hkrup mara gap shadam bun nga ai majaw, Nmawk hte Manje Muklum kata na mungshawa ni a dum nta ni wan hkru htenza nga ai lam chye lu ai.
Ya aten hta raitim Nmawk, Manje ginra ni hta hpyen masa shaja hkat nga ding yang rai nna, KIA hte gumshem Myen hpyen dap lapran gasat gala majan mung matut manoi naw byin nga ai re.
